Wed 15 Feb 2006
Á föstudaginn fyrir rúmri viku þá datt út sjónvarpið hjá okkur og eftir smá tilraunir komust við að því að við fengum ekkert merki inn í íbúðina. Við töluðum þá við nágranna okkar á hæðinni fyrir ofan og þar var það sama upp á teningnum. Þar sem við erum tengd í gegnum Breiðband Símans þá var ekkert annað að gera en að hringja í „þjónustu“-verið og athuga hvort það væri bilun í hverfinu eða götunni.
„Þú ert númer tólf í röðinni“ var mér svarað með vélrænni röddu. Eftir nokkuð langa bið kom röðin að mér en áður en ég gat útskýrt fyrir stúlkunni hvernig bilunin lýsti sér var hún búin að segja mér að þetta væri alveg örugglega innanhús vandamál, að loftnetssnúra hefði örugglega bilað hjá okkur. Ég spurði hana undrandi hvernig það gæti verið, þar sem þetta var ekki bara ein íbúð þá benti allt til þess að þetta væri bilun í götunni eða hverfinu. Hún sagði að það hefðu ekki neinar kvartanir borist svo það gæti ekki verið bilun hjá þeim. En hún vildi nú samt hjálpa mér og tók niður númerið og sagðist ætla að hringja í mælingadeildina, þeir gætu mælt þetta og séð hvort það væri einhver bilun í gangi, bara svona til að vera alveg viss. Ég fékk símtal nokkrum mínútum síðar og þar sem mér var tjáð að mælingadeildin segði að allt væri í himnalagi en benti mér á að skipta um loftnetssnúru.
Tveimur sjónvarpslausum dögum síðar fréttum við hjá nágrönnum okkar að það væri bilun í götunni og verið væri að vinna að viðgerð. Þremur sjónvarpslausum dögum síðar hringdi ég aftur í „þjónustuver“ Símans og aftur fékk ég að vita að ég væri aftur númer tólf í röðinni. Þegar loksins kom að mér var mér sagt að verið væri að vinna að biluninni en ekkert hægt að segja um hvenær henni yrði lokið. Rúmum fimm sjónvarpslausum dögum síðar fengum við aftur sjónvarp.
Ætli starfsfólk þjónustuvers Símans sé þjálfað til að segja að það bilunin sé hjá fólkinu sjálfu alveg sama hversu ósennilegt það kann að vera?
February 15th, 2006 at 12:52
Ef þér finnst þetta slæmt, prufaðu að hringja í ISNIC og reyna að fá þá til að aðstoða þig. Ég þurfti að rífast í þeim í nokkra daga á meðan þeir sögðu að það væri ekkert hægt að gera hjá þeim, jafnvel þótt þeir gætu lagað það … þeir bara vildu það ekki. Svo sögðu þeir mér að tala við annan aðila … en á endanum var þetta galli hjá þeim sem tók 26 sekúndur að laga.
Þjónustufólk er hresst.
February 15th, 2006 at 14:47
fá þér bara sjónvarp í gegnum adsl-ið…
þá eru ekki svona truflanir
February 15th, 2006 at 15:31
Er búinn að vera í samskiptum við ISNIC síðustu daga án vandkvæða - þau vandamál sem ég átti við að etja voru hjá hýsingaraðilanum eins og mér var kurteisislega bent á hjá ISNIC. En kannski var það bara slembilukka að vandamálið var ekki þeirra megin - en það tók fimm daga og jafnmarga tölvupósta að fá þetta í lag hjá hýsingaraðilanum.
Ég held að vandamálið sé ekki tæknin heldur þjónustan Eva. Skiptir engu máli hvort þetta heitir ADSL, Breiðband eða eitthvað allt annað þetta er tækni sem alltaf getur bilað. Það sem ég er að agnúast yfir er að ekki sé hægt að svara fólki sem hringir inn með vandamál á heiðarlegan hátt en ekki fullyrða strax að þetta sé ekki bilun hjá þeim. Oftast án þess að vita nokkuð um það. Ekki má gleyma það þarf að bíða í 15 - 20 mínútur eftir að fá að tala við einhvern í hvert skipti sem hringt er.
Hér er einn sem hætti viðskiptum við Símann út af þessu.
Þetta er farið að minna mjög mikið á British Telecom, þar var biðin stundum 30 - 60 mínútur eftir að ná í gegn - vonandi verður það ekki raunin hérna.
February 15th, 2006 at 15:44
Jamm er alveg sammála, það er hundleiðinlegt að bíða í síma eftir þjónustu og síðan er það enn meira pirrandi þegar fólkið veit ekki einu sinni um hvað er að tala.
February 17th, 2006 at 10:05
sorry misskildi aðeins… las betur núna
en já ég ætla ekki að afsaka símann eða neitta annað.. fæ nóg af því þegar ég er á launum