kjaftakindin

Niðurníðsla og veggjakrot í miðbænum er búið að vera mikið í umræðunni undanfarið. Í öllum hasarnum um hvað miðborgin sé öll útkrotuð gleymist að veggjakrotararnir setja líka mark sitt á aðra hluta höfuðborgarinnar eins og t.d. hverfið okkar - Laugarneshverfið. Ég tók einn 15 mínútna bíltúr í gærmorgun og myndaði það krot sem á vegi mínum varð.

Þetta er ekki beint fallegt. Ætla þó ekki að ganga svo langt að segja að hverfið sé í niðuríðslu eða að ástandið sé eitthvað verra en það hefur verið áður.

Oft heyrir maður að borgaryfirvöld þurfi að útbúa aðstöðu fyrir veggja-„listamennina“ og beina brúsum þeirra í réttan farveg á fyrirfram ákveðnum veggjum. Miðað við þessar myndir er ekki annað hægt en að gefa lítið fyrir svoleiðis útskýringar. Það er ekki hægt að sjá að það sé einhver listræn tjáning eða brennandi þörf á að segja eitthvað í þessu veggjakroti. Þetta eru krakkar með skemmdarfýsn en ekki tjáningarþörf. Skemmdarfýsninni verður ekki svalað með því að fá leyfi til að spreyja og bara á ákveðnum veggjum.

Burtséð frá þessum ófögnuði eru allar götur og stéttar skreyttar með brotnum flöskum og rusli. Maður verður sérstaklega mikið var við glerbrotin þegar er gengið með hund í bandi um hverfið enda stórhættulegt fyrir fjórar „berfættar“ fætur að stíga niður fæti þar sem glerbrot stendur upp úr malbikinu.

Ég held það sé kominn tími á vorhreingerningu í hverfinu.

Af hverju má ég fara í matvöruverslun og kaupa öl sem er 2.25% en þarf svo að gera mér ferð í sérstaka búð ef ég vill öl sem er með meira áfengismagn?

Á mbl.is í dag er frétt um að nýja Orkuveituhúsið hafi farið 4 milljarða fram úr kostnaðaráætlun, kostaði samtals 5.8 milljarða, en það átti upphaflega að kosta 1.8 milljarða.

4 milljarðar eru 4 þúsund milljónir og það er mikið fé. Af hverju byggði Orkuveitan ekki bara hefðbundið skrifstofuhúsnæði og gaf öllum þeim heimilum sem er í viðskiptum við það frítt rafmagn og heitt í vatn í hálft ár. Eða lækkaði bara gjaldskránna.

Já hann Alfreð Þorsteinsson stóð sig svo vel við byggingu Orkuveituhallarinnar að í staðinn fyrir að draga hann til ábyrgðar er hann er settur í að byggja hátæknispítalann. Ríkið áætlar 18 milljarða í það verkefni, verðum við ekki að gera ráð fyrir að Alfreð fari 36000000000 fram úr áætlun í því verkefni?

Við hérna á Laugarnesvegi númer fjörtíuogátta erum búin að fylgjast með rokkstjörnuævintýri Magna frá upphafi, dag og nótt bókstaflega.

Ég skellihló þegar ég heyrði að Guðmundur Magni úr hinni skelfilegu hljómsveit Á móti sól hefði komist í átján manna hópinn og hló ennþá hærra þegar hann komst í sjálfan þáttinn. En svo reyndist hann nú vera betri heldur en ég átti von á og er nú bara búinn að standa sig nokkuð vel í flest skiptin sem hann hefur komið fram. Það sem ég get ekki skilið er af hverju fólk fær ekki leið á nafnaklisjunni. Á ensku er það magnificent og magnified aftur og aftur en á okkar ylhýra er það magnaður, í miklu magni osfrv. Hér býð ég fram nokkur orð sem ekki er búið að hamast á:

Fyrir Dave, Gilby, TeeLee og herra Newsted: Magnification, magnify, magniloquent (er sögn og þýðir „using high-flown or bombastic language“, fínt fyrir TeeLee) og magnitude (great size or extent of something).

Fyrir hin stórskemmtilegu innskot „fræga fólksins“ á SkjáEinum: Magnari, Magnea, magnesín, magnbundinn (háður magni), magnlaus, magnstola (þýðir máttlaus), Magnús og magn-fenni (fannkyngi).

Fyndnast hefði verið fyrir hann að nota fyrra nafnið sitt, Guðmundur, í þáttunum. Þá hefði hann líklega verið kominn heim enda ekki auðvelt að muna nafnið, hvað þá að segja það. Ætli honum hefði ekki verið gefið gælunafnið Ice-God eða eitthvað álíka hallærislegt.

Undanfarna daga hefur svo borið á því að fyrirtæki eru að laumast ósmekklega upp á Magna-lestina til þess að fá ókeypis far upp á stjörnuhiminn. Tvö dæmi sem ég hef lesið um eru SPRON með peningagjöfum til Magna, sem vildi til að þeir auglýstu með ótalmörgum heilsíðuauglýsingum sem gefur til kynna að þetta hafi ekki verið gert með hans hagsmuni í huga. Síðan las ég í dag að einhvert fyrirtæki ætlaði að gefa hjónunum dúnsæng. Það er sko ódýr auglýsing.

Ég er nokkuð viss um að fleiri fyrirtæki bætast í hóp hinna ósmekklegu núna á næstu dögum.

Lesblindi fréttamaðurinn greinilega á vakt í kvöld.

Um jólin árið 1999 fékk ég mig fullsaddan af kjötáti og ákvað að draga kjötætuna í mér til hlés. Síðan eru liðin sex og hálft ár og hefur mig ekki enn langað í kjötbita.

Fyrr en núna.

Þessi löngun til að rífa í mig hold kom aftur þegar ég sá þessa frábæru auglýsingar frá norðlenska kjötvinnslufyrirtækinu Kjarnafæði sem bæði eru í dagblöðum og sjónvarpi þessa dagana og sést hér að ofan. Er það furða þegar við höfum svona seiðandi kjöt?

Að allri kaldhæðni slepptri þá er ég mjög hissa, miðað við þá vakningu sem hefur orðið í jafnréttismálum á undanförnum árum, að svona auglýsingar birtist ennþá. Myndlíkingin er sérlega óheppileg; konur eru neysluvara, fallegt og seiðandi kjöt sem þú verslar þér eftir þínum hentugleik. Fáðu þér kjöt, fáðu þér fyrsta flokks mellu.

Þegar ég og Dagbjört vorum að ræða þetta í gær minnti hún mig á auglýsingu sem Hvíta húsið gerði fyrir Stígamót fyrir nokkrum árum og er í raun sama auglýsingin með öfugum formerkjum. Í einfeldni minni bjóst ég við að víðsvegar um veraldarvefinn væri að finna öskureitt fólk að lýsa hneykslan sinni á þessum auglýsingum og með smá Gúgli komst ég að því að svo var ekki. Fólki virðist vera nokkuð sama um þetta að undanskildri henni og henni. Ég hef sterkan grun um að þetta hafi verið unnið á vinnustað þar sem aðeins vinna ungir karlmenn.

Hér er frétt á mbl um kynningu deiliskipulags nýs háskólasjúkrahúss og fylgir fréttinni mynd þar sem fyrirhugað svæði spítalans er afmarkað með rauðri línu.

Ef þetta svæði er afmarkað á loftmynd eins og hér fyrir neðan sést hve ótrúlegt landflæmi fer undir þennan spítala. Ekki er hægt að byggja upp í loft sökum flugvéla sem koma inn til lendingar á Reykjavíkurflugvelli og því verða þetta margar lágreistar byggingar sem dreifast yfir mikið svæði sem gerir allar vegalendir innan spítalans stjarnfræðilegar. Það segir sig sjálft að betra er að byggja upp í loftið þar sem löngum vegalengdum er eytt með lyftum milli hæða.

Fyrirhugað svæði er 198.777 fermetrar að flatarmáli, rétt tæplega 20 hektarar, sem er vel yfir tvöfalt það pláss sem tjörnin tekur. Svona í samhengi við alla þessa umræðu um þéttingu byggðar, verðmæti byggingarlands í miðbæ Reykjavíkur væri þá ekki sniðugt að byggja þennan spítala á einhverjum öðrum stað? Hver eru eiginlega rökin við að byggja hann upp þarna?

Stjórnendur mbl.is eru gjörsamlega farnir yfir strikið í magni auglýsinga á síðunni, svo mikið að það veldur mér miklum andlegum óþægindum að fara inn á síðuna. Hreinlega ekki hægt að láta bjóða sér þetta. Fyrir notendur Firefox vafrans er þó til ráð því hægt er að setja inn viðbót sem tekur út allar auglýsingar eins og myndin hér fyrir neðan sýnir. Alger himnasæla og hreinlega nýtt líf á öldum veraldarvefsins.

Fyrir þá sem það ekki vita þá er þessi viðbót sett inn með því að fara í „Tools“ og „Extensions“ í Firefox. Þá opnast nýr gluggi en þaðan er farið í „Get more extensions“ og þá kemur upp síða þar sem hægt er að finna allskonar viðbætur og þar á meðal Adblock. Fylgið svo bara leiðbeiningunum til að setja þetta inn. Athugið að það þarf að endurræsa vafrann til að virkja viðbótina.

Til að loka á auglýsingar á mbl.is þarf að stilla viðbótina og þá er aftur farið í „Tools“ en svo í „Adblock“ og svo „Preferences“. Í línunni „New filter“ er skrifað „mbl.is/augl“ og ýtt á „add“ hnappinn. Til að loka á allar auglýsingar á visir.is og blog.central.is er gert það sama nema í „New filter“ er skrifað „oams.visir.is/ads“.

Í Blaðinu í fyrradag er grein með fyrirsögninni „Barnlausir einstaklingar vanræktir í kosningum“. Í undirfyrirsögn er svo sagt: „Prófessor í stjórnmálafræði segir hugsanlega ástæðu fyrir lélegri kjörsókn vera áhugaleysi flokka á málefnum barnlausra einstaklinga.“

Téður prófessor, Ólafur Þ. Harðarson, segir svo: „Það gæti verið að stefnumál flokkanna hafi beinst of mikið að fjölskyldum og eldra fólki og því hafi einstaklingurinn gleymst.“ „ Allir flokkar voru að bjóða umfangsmikla félagsþjónustu en ekki að lækka skatta eða önnur málefni sem varða einstaklinginn.“

Við hérna á Laugarnesveginum vorum einmitt að ræða þetta nokkrum dögum fyrir kosningar hversu áberandi það væri að framboðin kepptust um atkvæði barnafólks en mikið minna, ef þá eitthvað, um atkvæði okkar hinna. Loforð um minna skutl, ókeypis leikskóla, frístundakort upp á 50 þúsund fyrir hvert barn, samhangandi skóladag og þar fram eftir götunum var það sem hamrað var á. Það er hinsvegar mjög skrýtið því börn eru jú bara á þessum aldri í örfá ár en fólk hefur líklega kosningarétt í 60 - 70 ár. Þeir sem annaðhvort eiga ekki börn eða börn sem eru vaxin úr grasi eru þá líklega í miklum meirihluta kjósenda og því skrýtið að svona mikið skuli vera keyrt á þessu.

Fyrir utan þetta er líka áhugaverð sú staðreynd að skattgreiðendur sem ekki eiga börn séu að greiða fyrir þetta í stað þess að lækka skatta eða eitthvað annað sem kemur öllum vel. Fólk hefur þá sjálft vald yfir því hvað það notar peninginn í.